மிஸஸ் அண்ட் மிஸ்டர் – விமர்சனம்

நடிப்பு: வனிதா விஜயகுமார், ராபர்ட் மாஸ்டர், ஷகிலா, பவர் ஸ்டார் சீனிவாசன், பாத்திமா பாபு, ஸ்ரீமன், கிரண் ரத்தோர், ஆர்த்தி கணேஷ், கணேஷ், ரவிகாந்த், அனுமோகன் மற்றும் பலர்

எழுத்து & இயக்கம்: வனிதா விஜயகுமார்

ஒளிப்பதிவு: ராஜபாண்டி டி (தாய்லாந்து), விஷ்ணு ராமகிருஷ்ணன் (சென்னை), டிஜி கபில் (துபாய்)

படத்தொகுப்பு: பாலகுரு

இசை: ஸ்ரீகாந்த் தேவா

தயாரிப்பு: ஜோவிகா விஜயகுமார்

பத்திரிகை தொடர்பு: நிகில் முருகன்

காதல் திருமணம் செய்து கொண்ட வித்யாவும் (வனிதா விஜயகுமார்), அருணும் (ராபர்ட் மாஸ்டர்) தாய்லாந்தின் தலைநகர் பாங்காக்கில் மகிழ்ச்சியாக வாழ்ந்து வருகிறார்கள். நாற்பது வயதைத் தொட்டுவிட்ட வித்யா, குழந்தை பெற்றுக்கொள்ள ஆசைப்படுகிறார். ஆனால், அருண் குழந்தை வேண்டாம் என்பதில் பிடிவாதமாக இருக்கிறார். இதனால் இருவரும் அடிக்கடி சண்டை போட்டுக் கொண்டாலும், அருண் மூலம் கர்ப்பம் தரிப்பதற்கான அனைத்து முயற்சிகளிலும் வித்யா ஈடுபட்டு வருகிறார். விளைவாக, வனிதா கர்ப்பமாகி விட, இது அருணுக்குத் தெரிந்தால் குழந்தை பெற்றுக்கொள்ள அவர் தடையாக இருப்பார் என்று நினைத்து, அவருக்குத் தெரியாமல் பாங்காக்கில் இருந்து கிளம்பி இந்தியா வந்துவிடுகிறார்.

வித்யாவின் பிரிவுத் துயரைத் தாங்க முடியாமல் தவிக்கும் அருண், வித்யாவை தேடி இந்தியா வருகிறார். வித்யா ஆசைப்பட்டது போல் குழந்தை பெற்றுக் கொண்டாரா? அவரது கணவர் அருண் குழந்தை வேண்டாம் என்று சொல்வதற்கான காரணம் என்ன? என்பன போன்ற கேள்விகளுக்கு விடை அளிக்கிறது ‘மிஸஸ் அண்ட் மிஸ்டர்’ திரைப்படத்தின் மீதிக்கதை.

நாயகி வித்யாவாக நடித்திருக்கும் வனிதா விஜயகுமார், நாற்பது வயது பெண்மணி கதாபாத்திரத்தில் கச்சிதமாக நடித்திருக்கிறார். தன் கணவரை உருகி உருகி காதலிப்பவர், கருவுறுவதற்காக செய்யும் வேலைகள் அனைத்தும் ஓவர் ’கில்மா’வாக இருக்கிறது.

நாயகன் அருணாக நடித்திருக்கும் நடன இயக்குநர் ராபர்ட் மாஸ்டர், தனக்கு மனைவி மட்டும் போதும், குழந்தை வேண்டாம் என்பதற்கான காரணத்தை மறைத்து, அவரை காப்பாற்ற போராடும் காட்சிகளில் நேர்த்தியாக நடித்திருக்கிறார்.

இவர்களுடன் நடித்திருக்கும் ஷகிலா, பவர் ஸ்டார் சீனிவாசன், ஃபாத்திமா பாபு, ஸ்ரீமன், ஆர்த்தி கணேஷ், கணேஷ், ரவிகாந்த், அனுமோகன், வாசுகி, ஸ்வேதா பாரதி மற்றும் ஒரு பாடலுக்கு நடனம் ஆடியிருக்கும் கிரண் என அனைவரும் ரொம்ம்ம்ம்ப பழைய நடிகர் நடிகைகளாக இருப்பதால், அவர்களது திரை இருப்பு மற்றும் நடிப்பு படத்திற்கு எந்த விதத்திலும் கைகொடுக்கவில்லை.

நாயகியாக நடித்திருப்பதோடு எழுதி இயக்கியிருக்கும் வனிதா விஜயகுமார், தற்போதைய காலகட்ட இளைஞர்களுக்குப் பிடிக்கும் ஒரு படமாக கொடுக்க முயற்சித்திருந்தாலும், அதை பழைய பாணியில் கொடுத்திருக்கிறார். பாடல் காட்சிகளில் கவர்ச்சி, வசனக் காட்சிகளில் இரட்டை அர்த்தம், பழைய நடிகர்கள் கூட்டத்தை வைத்துக்கொண்டு நகைச்சுவை என முழுக்க முழுக்க கமர்ஷியலான ஒரு படத்தை கொடுத்திருந்தாலும், அதை முழுமையாக ரசிக்கும்படியான ஒரு படமாக கொடுக்க தவறியிருக்கிறார்.

ஸ்ரீகாந்த் தேவாவின் இசையில் பாடல்கள் ஆட்டம் போட வைக்கிறது. பின்னணி இசை காட்சிகளுக்கு ஏற்ப அமைந்திருக்கிறது.

ஒளிப்பதிவாளர்கள் ராஜபாண்டி.டி, விஷ்ணு ராமகிருஷ்ணன், டிஜி கபில் ஆகியோரது பணியில் குறையில்லை.

‘மிஸஸ் அண்ட் மிஸ்டர்’ – ஒருமுறை பார்க்கலாம்!

ரேட்டிங்: 2.5/5.