காதல் ரீசெட் ரிப்பீட் – விமர்சனம்

நடிப்பு: மதும்கேஷ், ஜியா சங்கர், அர்ஜுன் அசோகன், எம்.எஸ்.பாஸ்கர், ஜெயப்பிரகாஷ், விஜி சந்திரசேகர் மற்றும் பலர்

இயக்கம்: விஜய்

கதை: ஏ.மகாதேவ் & விஜய்

திரைக்கதை: ஏ.மகாதேவ்

வசனம்: இயக்குநர் விஜய்

ஒளிப்பதிவு: அரவிந்த் கிருஷ்ணா

படத்தொகுப்பு: ஆண்டனி

இசை: ஹாரிஸ் ஜெயராஜ்

பாடல் வரிகள்: வைரமுத்து, கார்க்கி & ஆர்கஸ் ஆர்யன்

கலை: சரவணன் வசந்த்

சண்டை அமைப்பு: மனோகர் வர்மா

உடை வடிவமைப்பு – ருசி முனோத்

நடன அமைப்பு – சாண்டி மாஸ்டர் & ரகு தாபா

தயாரிப்பு: டி ஸ்டூடியோஸ், சன்னி டென்வி (டென்வி புரொடக்ஷன்)

பத்திரிகை தொடர்பு: யுவராஜ்

பணக்கார குடும்பத்தில் பிறந்த நாயகி அதிதிக்கு (ஜியா சங்கர்), இசைத்துறையில் சாதிக்க வேண்டும் என்பது பெருங்கனவு. இப்பெருங்கனவுடன் ‘ஃப்ளை ஹை’ என்ற இசைக்குழுவில் இணைந்து பாடகியாக இருக்கிறார். அதே இசைக்குழுவிலிருக்கும் ஹரி என்ற ஹரிச்சந்திரனும் (அர்ஜுன் அசோகன்), அதிதியும் காதலர்களாக இருக்கிறார்கள். அதே சமயம் அதிதியை ஒருதலையாகக் காதலிக்கும் நாயகன் சித்தார்த் (மதும்கேஷ்), அதிதி எங்கே சென்றாலும் அவரைப் பின்தொடர்வதும், வீட்டின் வாசலில் போய் நிற்பதுமாக இருக்கிறார்.

ஸ்காட்லாந்தில் நடக்கும் இசைப் போட்டியில் கலந்துகொள்ள அதிதி – ஹரி காதல் ஜோடி திட்டமிடுகிறது. அப்போது வீட்டில் கல்யாணப் பேச்செடுக்க, வீட்டில் யாரிடமும் சொல்லாமல் ஸ்காட்லாந்துக்கு பறந்து விடுகிறது காதல் ஜோடி. அதிதிக்குத் தெரியாமல் சித்தார்த்தும் பின்தொடர்கிறார்.

ஸ்காட்லாந்தில் பயங்கரமான விபத்து ஒன்றில் சிக்கும் அதிதி, ஹரியைப் பிரிவதோடு, ஞாபக மறதியாலும் பாதிக்கப்படுகிறார். நடப்பவை எதுவும் ஒருநாள் மட்டுமே நினைவிலிருக்கும்; தூங்கி எழுந்தால் எல்லாம் மறந்துவிடும் என்ற பரிதாப நிலையிலிருக்கும் அதிதி, தான் யார் என்றுகூட தெரியாமல் தவிக்கிறார்.

இப்போது, அதிதியின் நெடுநாள் காதலர் என்று சொல்லிக்கொண்டு அவருக்கு அறிமுகமாகிறார் சித்தார்த். அவர் சொன்ன இந்த பொய், அதிதி, சித்தார்த், ஹரி ஆகியோருக்கு என்னென்ன பிரச்சனைகளை ஏற்படுத்துகிறது? முடிவு என்ன? என்பன போன்ற கேள்விகளுக்கு உணர்ச்சிபூர்வமாக விடை அளிக்கிறது ‘காதல் ரீசெட் ரிப்பீட்’ திரைப்படத்தின் மீதிக்கதை.

நாயகியாக, பாடகி அதிதியாக அறிமுக நடிகை ஜியா ஷங்கர் நடித்திருக்கிறார். துறுதுறு சேட்டைப் பேர்வழியாகவும், என்ன நடந்தது? எங்கே இருக்கிறோம்? சுற்றியிருக்கும் இவர்கள் யார்? என அனைத்தும் மறந்து தவிப்பவராகவும் அருமையாக நடித்து, இப்படத்தை தன் தோளில் தூக்கிப் பிடித்து நிறுத்தியிருக்கிறார்.

நாயகனாக, ஒருதலைக் காதலர் சித்தார்த்தாக அறிமுக நடிகர் மதும்கேஷ் நடித்திருக்கிறார். அறிமுக நடிகர் போல் இல்லாமல் அனுபவம் வாய்ந்த நடிகர் போல், ஒருதலைக் காதல் தவிப்பை இயல்பாகவும், சிறப்பாகவும் கையாண்டிருக்கிறார்.

நாயகியின் காதலர் ஹரி என்ற ஹரிச்சந்திரனாக அர்ஜுன் அசோகன் நடித்திருக்கிறார். மலையாளத்தில் பல படங்களில் நடித்துள்ள அர்ஜுன் அசோகனுக்கு இது முதல் தமிழ்ப் படம். தனக்கு கொடுக்கப்பட்ட பாத்திரத்தைச் சரியாகச் செய்திருக்கிறார்.

எம்.எஸ்.பாஸ்கர், ஜெயப்பிரகாஷ், விஜி சந்திரசேகர் உள்ளிட்டோர் தத்தமது கதாபாத்திரத்துக்குத் தேவையான நடிப்பை குறைவின்றி நிறைவாக வழங்கியிருக்கிறார்கள்.

இப்படத்தை ஏ.மகாதேவுடன் சேர்ந்து எழுதியிருக்கிறார் இயக்குநர் விஜய். முக்கோணக் காதலில் ஞாபகமறதியைக் கலந்து புதிய வடிவில் இதை கொடுக்க முயற்சித்திருக்கிறார். என்றாலும், திரைக்கதையில் இன்னும் சற்று கூடுதல் கவனம் செலுத்தியிருக்கலாம்.

அரவிந்த் கிருஷ்ணாவின் ஒளிப்பதிவு அழகாக இருக்கும் ஸ்காட்லாந்தைப் பேரழகாகக் காட்டியிருக்கிறது.

ஹாரிஸ் ஜெயராஜ் இசையில் பாடல்கள் கேட்கும் ரகம். பின்னணி இசை ஓ.கே ரகம்.

படத்தின் நீளத்தை படத்தொகுப்பாளர் ஆண்டனி இன்னும் கொஞ்சம் நறுக்கியிருக்கலாம்.

‘காதல் ரீசெட் ரிப்பீட்’ – லாஜிக் மீறல்களைப் பொருட்படுத்தாமல் பார்த்தால் ரசித்து மகிழலாம்!

ரேட்டிங்: 3/5.