லவ் இன்சூரன்ஸ் கம்பெனி (LIK) – விமர்சனம்

நடிப்பு: பிரதீப் ரங்கநாதன், கிரித்தி ஷெட்டி, சீமான், எஸ் ஜே சூர்யா, யோகி பாபு, கௌரி ஜி கிஷன், ஷா ரா, ஆனந்தராஜ், மாளவிகா மற்றும் பலர்

எழுத்து & இயக்கம்: விக்னேஷ் சிவன்

ஒளிப்பதிவு: ரவி வர்மன்

படத்தொகுப்பு: பிரதீப் இ ராகவ்

இசை: அனிருத்

பாடல் வரிகள்: விக்னேஷ் சிவன்

நடனம்: ஜானி, பாபா பாஸ்கர், சதீஷ் கிருஷ்ணன், சாண்டி, அனுஷா விஸ்வநாதன், சக்திவேல் & சுரேன் ஆர்

ஆடை வடிவமைப்பு: பிரவீன்ராஜா, ரினிபாந்த், ஜேகட்லீரிண்டியா & ஷங்ரீஹான் கே.எஸ்

கலை: கண்ணன் எஸ்

ஸ்டண்ட்: பீட்டர் ஹெய்ன்

தயாரிப்பாளர்: நயன்தாரா

தயாரித்து வழங்குபவர்: எஸ்.எஸ்.லலித் குமார்

பத்திரிகை தொடர்பு: யுவராஜ்

இப்படக்கதை, இன்னும் 14 ஆண்டுகளுக்குப் பிறகு, அதாவது 2040ஆம் ஆண்டு நடப்பதாக கற்பனையாக கட்டமைக்கப்பட்டுள்ளது. அப்போது சென்னை மாநகர் இப்போது இருப்பதைக் காட்டிலும் அதிநவீன தொழில்நுட்பங்களில் அதிதீவிரமாக வளர்ச்சியடைந்து, வேறொரு புது உலகம் போல் ஜொலிக்கிறது. வானளாவிய கட்டிடங்கள், ஹாலோகிராஃபிக் விளம்பரப் பலகைகள், வானில் பறக்கும் கார்கள் என அதிநவீன தொழில்நுட்ப நகரமாகக் காட்சியளிக்கிறது. இங்கு வாழும் மனிதர்களும் வித்தியாசமான உடை, வித்தியாசமாக வடிவமைக்கப்பட்ட மூக்குக் கண்ணாடி என முற்றிலும் முன்னேறிய தோற்றத்தில் நடமாடுவதோடு, முழுக்க முழுக்க ஸ்மார்ட் போன்களைச் சார்ந்து, ’ஸ்மார்ட்போன் அடிமை’களாக வாழ்ந்து வருகிறார்கள்.

இந்நகரில், காதலித்து திருமணம் செய்துகொண்ட சூரியன் (எஸ்.ஜே.சூர்யா), திருமண வாழ்க்கையில் ஏற்பட்ட தோல்வியால் மனமுடைந்து தவித்தவர், இனி எந்த காதலருக்கும், எந்த தம்பதியருக்கும் இந்த நிலை ஏற்படக் கூடாது என்ற எண்ணத்தில் பல ஆண்டுகள் உழைத்து, 2040-ல் ‘லவ் இன்சூரன்ஸ் கம்பெனி’ (Love Insurance company) – சுருக்கமாக ’எல்ஐகே’ – என்ற செயலியை (APP) உருவாக்குகிறார். இந்த செயலி மூலம் தங்கள் காதலர் அல்லது வாழ்க்கைத் துணை தங்களுக்கு உண்மையாக இருக்கிறாரா? அவர் இப்போது எங்கே, என்ன செய்துகொண்டிருக்கிறார்? என்பதை உடனுக்குடன் கண்டுபிடிக்க முடிவதால், இந்த செயலிக்கு காதலர்கள் மற்றும் தம்பதிகள் மத்தியில் நல்ல வரவேற்பு கிடைக்கிறது. இதை விற்று சூரியன் பெரும் பணக்கார தொழிலதிபராகத் திகழ்கிறார்.

மேற்கண்ட ‘எல்ஐகே’ வாடிக்கையாளர் நாயகி தீமா (கிரித்தி ஷெட்டி). சிறுவயது முதல் ஸ்மார்ட்போனும் கையுமாக இருந்து, ஸ்மார்ட்போனின் வழிகாட்டுதலில் வளர்ந்தவர். தற்போது ‘இன்ஃபுளுயன்சர்’ ஆக இருப்பவர். தனது சமூக ஊடகப் பக்கங்களைப் பின்தொடர்பவர்களின் எண்ணிக்கையை அதிகரிக்கும் முயற்சியில் தீவிரமாக இருப்பவர்.

மறுபுறம், செல்போன் உள்ளிட்ட நவீன தொழில்நுட்பத்துக்கு அடிமையானவர்களைக் குணப்படுத்த, தொழில்நுட்ப வாடையே இல்லாமல் இயற்கை சூழ்ந்த ஓரிடத்தில் ‘ஆர்கானிக் வேர்ல்ட்’ என்ற மையத்தை நடத்தி வருகிறார் அன்புக்கடல் (சீமான்). அவரது மகன் நாயகன் வைப் வஸ்ஸி (பிரதீப் ரங்கநாதன்). தனது தந்தையைப் போலவே ஸ்மார்ட்போன் இல்லாத உலகத்தை விரும்புபவர்.

இப்படியாக, செல்போனே கூடாது என்ற கொள்கை உடைய நாயகன் வைப் வஸ்ஸி, செல்போனே கதி என்றிருக்கும் நாயகி தீமாவை ஒரு மழை நேரத்தில் கண்டதும் காதல் கொள்கிறார். தீமாவுக்காக அவர் தன் கொள்கையைத் துறந்து செல்போன் வாங்குகிறார். இருவரும் நட்புடன் பழகி காதலர்கள் ஆகிறார்கள்.

இந்த சமயத்தில் தொழிலதிபர் சூரியன், தனது எல்ஐகே செயலியில் ‘லவ் மீட்டர்’ என்ற அப்டேட்டை அறிமுகம் செய்கிறார். இந்த ‘லவ் மீட்டர்’ மூலம் காதலர்கள் மற்றும் தம்பதியர் தங்களுக்கிடையே உள்ள காதலின் அளவு எத்தனை சதவிகிதம் என்பதை அறிந்துகொள்ள முடிகிறது என்பதால் இதற்கும் நல்ல வரவேற்பு கிடைக்கிறது.

இந்நிலையில், தனது வாழ்க்கைத் துணையைத் தேர்ந்தெடுக்க ‘எல்ஐகே’ செயலியையே தீமா முழுமையாக நம்புவதால், அவரும் வைப் வஸ்ஸியும் ‘லவ் மீட்டர்’ பரிசோதனையில் ஈடுபடுகிறார்கள். அந்த ‘லவ் மீட்டர்’ இவர்களுக்கிடையிலான காதலின் அளவு வெறும் 3 சதவிகிதம் மட்டுமே என்று காட்டுவதால், “பொருத்தம் இல்லை” என்று தீமா காதலை முறித்துக்கொண்டு வைப் வஸ்ஸியை விட்டு பிரிந்து போய்விடுகிறார்.

இதனால் ஆவேசமடையும் வைப் வஸ்ஸி, தீமா மீதான தன் காதலை தவறாக குறைத்து மதிப்பிட்ட ’எல்ஐகே’ செயலி போலியானது என்று தொழிலதிபர் சூரியனிடம் வாதாட, சூரியனோ, தன் ‘எல்ஐகே’ செயலியும், அதன் தகவல்களும் உண்மையானவை என்று வாதாடுகிறார். இதனால் வைப் வஸ்ஸிக்கும் சூரியனுக்கும் இடையே மோதல் ஏற்படுகிறது. இருவரும் தத்தமது வாதத்தை நிரூபிப்பதாக சவால் விடுகிறார்கள்.

இந்த சவாலில் வைப் வஸ்ஸி வெற்றி பெற்றாரா? மென்மையான காதல் உணர்வை எந்திரத்தனமான செயலியால் அளவிட முடியாது என்பதை நிரூபித்தாரா? காதலை முறித்துச் சென்ற தீமாவுடன் மீண்டும் இணைந்தாரா? என்பன போன்ற கேள்விகளுக்கு எமோஷனலாக விடை அளிக்கிறது ‘லவ் இன்சூரன்ஸ் கம்பெனி (LIK)’ திரைப்படத்தின் மீதிக்கதை.

நாயகன் வைப் வஸ்ஸியாக பிரதீப் ரங்கநாதன் நடித்துள்ளார். இளைஞர்களை ஈர்க்கும் வகையில் காதல், நகைச்சுவை கதைகளில் நடிப்பது அவருக்கு கைவரப்பெற்ற கலை என்பதால், வழக்கம் போல் கலக்கியிருக்கிறார். காட்சிக்குக் காட்சி இளம்தலைமுறையினர் விரும்பும் உடல்மொழி மற்றும் துள்ளலான நடிப்பால் பிரித்து மேய்ந்திருக்கிறார். செல்போனை வெறுக்கும் தந்தையின் மகனாக முதலில் வருவது, பின்னர் காதலிக்காக தந்தைக்குத் தெரியாமல் செல்போன் பயன்படுத்துவது, காதலை காதலி முறித்ததும் மனமுடைவது, ’எல்ஐகே’ செயலிக்கு எதிராக போராடுவது, பிரிந்துபோன காதலிக்காக ஏங்குவது, காதலிக்கு உண்மைக் காதலைப் புரிய வைக்க முயற்சி செய்வது என படம் முழுக்க சிறப்பாக நடிப்பை வெளிப்படுத்தி கவனம் ஈர்க்கிறார். பாராட்டுகள் பிரதீப் ரங்கநாதன்!

’இன்ஃபுளுயன்சர்’ தீமாவாக கிரித்தி ஷெட்டி நடித்திருக்கிறார். பேரழகுக்கு இலக்கணமாய் இருக்கிறார். நாயகனுக்கு ஈடு கொடுத்து, கொடுத்த வேலையை குறைவின்றி நிறைவாகச் செய்திருக்கிறார்.

தொழிலதிபர் சூரியனாக எஸ்.ஜே.சூர்யா நடித்திருக்கிறார். ஸ்டைலிஷ் வில்லனாக வந்து வழக்கமான பாணியில் மிரட்டல் நடிப்பைக் கொடுத்து, படத்தின் தூணாக நின்று, அசர வைக்கிறார்.

நாயகனின் தந்தை அன்புக் கடலாக சீமான் நடித்திருக்கிறார். ஸ்மார்ட்போன் விரோதியாக வந்து அழுத்தமான நடிப்பால் கவனிக்க வைக்கிறார். அவர் தமிழ் சமூகத்துக்குத் தீங்கிழைக்கும் வகையில் தற்போது செய்துவரும் இழிவான அரசியலுக்கு முழுக்குப் போட்டுவிட்டு, இப்படி நல்ல குணச்சித்திர வேடங்களைத் தேர்ந்தெடுத்து நடித்து மக்களை ரசிக்க வைத்தால் அவரது பாவங்களுக்கு சாபவிமோசனமாவது
கிடைக்கும்.

நாயகியின் அம்மாவாக ‘வாள மீனு’ மாளவிகா ரீ-எண்ட்ரி கொடுத்திருக்கிறார்.

கல்கி என்ற கதாபாத்திரத்தில் கிளாமர் உடைகளில் வருகிறார் கௌரி ஜி கிஷன். அய்யோ… பாவம்!

ஜாலி பிரபுவாக வரும் யோகி பாபு, கபூர் கானாக வரும் ஷா ரா, எச் ஏ சுப்புவாக வரும் ஆனந்தராஜ் மற்றும் விடிவி கணேஷ் உள்ளிட்டோர் தத்தமது கதாபாத்திரத்துக்கு தேவையான நடிப்பை வழங்கியிருக்கிறார்கள்.

இப்படத்தை எழுதி இயக்கியிருக்கிறார் இயக்குநர் விக்னேஷ் சிவன். எதிர்கால தொழில்நுட்பத்திற்கும் மனித உணர்வுகளுக்கும் இடையிலான முரணை மையமாக வைத்து, இளம் தலைமுறையினருக்கு பிடிக்கும் விதமாக பிரமாண்ட காட்சிகளைக் கற்பனை செய்து திரைக்கதை அமைத்து, சுவாரஸ்யமாகவும், விறுவிறுப்பாகவும் படத்தை நகர்த்திச் சென்றுள்ளார். எனினும், கதையிலும், திரைக்கதையிலும் கூடுதல் கவனம் செலுத்தியிருந்தால், மனச்சோர்வின்றி, படத்தை இன்னும் நன்றாக ரசித்திருக்கலாம்.

இசையமைப்பாளர் அனிருத்தின் ‘தீமா’ பாடல் மற்றும் மிரட்டலான பின்னணி இசை, ஒளிப்பதிவாளர் ரவி வர்மனின் சர்வதேச தரத்திலான ஒளிப்பதிவு, படத்தொகுப்பாளர் பிரதீப் இ ராகவின் விறுவிறுப்பைக் கூட்டும் படத்தொகுப்பு, எதிர்கால சென்னையை தத்ரூபமாக உருவாக்கிய முத்துராஜின் கலை இயக்கம் உள்ளிட்ட தொழில்நுட்பங்கள் படத்துக்கு பலம்.

‘லவ் இன்சூரன்ஸ் கம்பெனி (LIK)’ – பிரதீப் ரங்கநாதனின் துள்ளலான நடிப்புக்காக பார்த்து ரசிக்கலாம்!

ரேட்டிங்: 3.5/5