முஸ்தபா முஸ்தபா – விமர்சனம்

நடிப்பு: சதீஷ், சுரேஷ் ரவி, மோனிகா சின்னகோட்லா, மானசா சௌத்ரி, கருணாகரன், புகழ், ஜாவா சுந்தரேசன், லிவிங்ஸ்டன், உமா, சூப்பர்குட் சுப்பிரமணி, பாவெல் நவகீதன், ஐஸ்வர்யா தத்தா, விஜே பார்வதி, விஜே மகேஸ்வரி, சாணக்யன் மற்றும் பலர்

எழுத்து & இயக்கம்: பிரவீன் சரவணன்

ஒளிப்பதிவு: கே.எஸ்.விஷ்ணு ஸ்ரீ

படத்தொகுப்பு: தினேஷ் பொன்ராஜ்

இசை: எம்.எஸ்.ஜோன்ஸ் ரூபர்ட்

தயாரிப்பு: ‘தி மாபோகோஸ்’ பிரதீப் மகாதேவன்

தமிழ்நாடு வெளியீடு: ’சக்தி ஃபிலிம் ஃபேக்டரி’ சக்திவேலன்

பத்திரிகை தொடர்பு: டிஒன் சுரேஷ் சந்திரா, ஏ.அப்துல் நாசர்

தனியார் தொலைக்காட்சி ஒன்றில் தொகுப்பாளராகப் பணியாற்றும் நாயகன் கார்த்திக் (சதீஷ்), மருத்துவரான நாயகி ஸ்டெஃபியை (மோனிகா சின்னகோட்லா) காதலிக்கிறார். எந்த கெட்ட பழக்கங்களும் இருக்கக் கூடாது என்ற கண்டிஷனுடன் ஸ்டெஃபி திருமணத்திற்கு சம்மதிக்கிறார்.

இரு வீட்டாரும் சம்மதித்து திருமண ஏற்பாடுகள் நடக்கும் வேளையில், கார்த்திக் ஒரு பெண்ணுடன் (ஐஸ்வர்யா தத்தா) அந்தரங்கமாக இருக்கும் வீடியோ இணையத்தில் கசிகிறது. உண்மையில் அது கார்த்திக் தனது சினிமா அறிமுகத்திற்காக நடித்த ஒரு படத்தின் டீசர் காட்சி. ஆனால், இதைச் சொன்னால் காதலி நம்ப மாட்டார் என்ற பயத்தில், தனது நண்பர் வாசு (சுரேஷ் ரவி) மற்றும் ஹேக்கர் சிட்டி (கருணாகரன்) உதவியுடன் அந்த வீடியோவை இணையத்திலிருந்து நீக்கப் போராடுகிறார் கார்த்திக்.

இந்த முயற்சியில் அவர்கள் சந்திக்கும் குழப்பங்கள் என்ன? வீடியோவின் பின்னணியில் இருக்கும் அதிர்ச்சிகரமான உண்மை என்ன? இறுதியில் கார்த்திக் – ஸ்டெஃபி திருமணம் என்ன ஆனது? என்பன போன்ற கேள்விகளுக்கு நகைச்சுவை ததும்ப விடை அளிக்கிறது ‘முஸ்தபா முஸ்தபா’ திரைப்படத்தின் மீதிக்கதை.

நாயகன் கார்த்திக்காக சதீஷ் நடித்திருக்கிறார். அவர் தனது வழக்கமான நகைச்சுவை பாணியில், ஒரு இக்கட்டான சூழலில் சிக்கித் தவிக்கும் இளைஞராக வருகிறார். பயம், நடுக்கம், நகைச்சுவை என பல பரிமாணங்களை வெளிப்படுத்தும் இயல்பான நடிப்பால் கவர்கிறார்.

நாயகனின் நெருங்கிய நண்பர் வாசுவாக சுரேஷ் ரவி நடித்திருக்கிறார். இவர் படம் முழுவதும் பயணித்து, பல இடங்களில் நாயகனுக்கு இணையான முக்கியத்துவத்தைப் பெறுகிறார். அவருக்கு உதவி செய்வதும், உபத்திரவம் செய்வதுமாக படத்தை நன்றாக நகர்த்தியுள்ளார்.

நாயகி ஸ்டெஃபியாக வரும் மோனிகா சின்னகொட்லா, அழகோடு அளவான பங்களிப்பைச் செய்திருக்கிறார்.

சிட்டி என்ற ஹேக்கராக கருணாகரன் நடித்திருக்கிறார். படத்தின் முக்கிய திருப்புமுனையாக வருவதோடு, நகைச்சுவையிலும் ஸ்கோர் செய்திருக்கிறார்.

ஐஸ்வர்யா தத்தா, புகழ், ஜாவா சுந்தரேசன், லிவிங்ஸ்டன், உமா, சூப்பர் குட் சுப்பிரமணி, பாவெல் நவகீதன், விஜே பார்வதி, விஜே மகேஸ்வரி, சாணக்யன் உள்ளிட்டோர் தத்தமது கதாபாத்திரத்துக்குத் தேவையான நடிப்பை வழங்கியிருக்கிறார்கள்.

இப்படத்தை எழுதி இயக்கியிருக்கிறார் பிரவீன் சரவணன். தற்கால டிஜிட்டல் உலகில், தவறாக புரிந்துகொள்ளப்படும் ஒரு வீடியோ, ஒருவரின் வாழ்க்கையை எப்படிப் புரட்டிப் போடுகிறது என்ற விழிப்புணர்வை ஏற்படுத்தும் நல்ல கருத்தை பொழுதுபோக்கு அம்சங்களுடன் கலகலப்பாக சொல்லியிருக்கிறார் இயக்குநர். அவர் கிளைமாக்ஸில் வைத்திருக்கும் எதிர்பாராத ட்விஸ்ட் படத்திற்கு புதுமை சேர்க்கிறது.

ஜோன்ஸ் ரூபர்ட்டின் இசை, விஷ்ணு ஸ்ரீயின் ஒளிப்பதிவு, தினேஷ் பொன்ராஜின் படத்தொகுப்பு உள்ளிட்ட தொழில்நுட்பங்கள் படத்துக்கு பலம்.

‘முஸ்தபா முஸ்தபா’ – காமெடி படம்; கண்டு களிக்கலாம்!

ரேட்டிங்: 3/5