O.M (ஆபரேஷன் மோல்) – விமர்சனம்
நடிப்பு: தனுஷ், மம்முட்டி, சாய் பல்லவி, ஸ்ரீலீலா, நசீருதீன் ஷா, இந்திரன்ஸ், ரேணு தேசாய், சைது ஜொன்னலகட்டா, சஞ்சய் ஸ்வரூப் மற்றும் சிலர்
எழுத்து & இயக்கம்: ராஜ்குமார் பெரியசாமி
ஒளிப்பதிவு: கே.எழில் அரசு
படத்தொகுப்பு: ஆர்.கலைவாணன்
இசை: சாய் அபயங்கர்
நடன அமைப்பு: சாண்டி
ஸ்டண்ட் ஒருங்கிணைப்பு: கேச்சா கம்பக்டீ, யானிக் பென்
தயாரிப்பு: வுண்டர்பார் ஃபிலிம்ஸ் & ஆர்டேக் ஸ்டூடியோஸ்
தயாரிப்பாளர்கள்: தனுஷ், ஷ்ரத்தா அகர்வால், அஸ்மத் ஜக்மாக்
பத்திரிகை தொடர்பு: எய்ம் சதீஷ், சிவா, ரியாஸ் கே அஹ்மத், பாரஸ் ரியாஸ்
‘மோல் (Mole)’ என்ற ஆங்கிலச் சொல்லுக்கு சூழலுக்கு ஏற்ப பல அர்த்தங்கள் உள்ளன. அவற்றில், ‘எதிரியின் கோட்டைக்குள் ஊடுருவி முக்கிய தகவல்களை சேகரிக்கும் ரகசிய உளவாளி’ என்ற அர்த்தமும் ஒன்று. இந்த அர்த்தம், தனுஷ் நடிப்பில் ராஜ்குமார் பெரியசாமி இயக்கியுள்ள திரைப்படத்துக்குப் பொருத்தமாக இருப்பதால், இப்படத்துக்கு ‘ரகசிய உளவாளி நடவடிக்கை’ என்ற பொருளில் ‘Operation Mole’ என பெயர் சூட்டியிருக்கிறார்கள். அதன் சுருக்கமே ‘O.M’.
ஆந்திர மாநில வனப்பகுதிகளில், சர்வதேச சந்தையில் அதிக விலைக்குப் போகும் செம்மரங்கள் இருக்கின்றன. இவை, தமிழ்நாட்டின் திருவண்ணாமலைப் பகுதியைச் சேர்ந்த ஏழைப் பழங்குடியினரான கூலித் தொழிலாளர்களைக் கொண்டு சட்டவிரோதமாக வெட்டப்பட்டு, ரகசியமாக தமிழ்நாட்டுக்குக் கடத்தப்பட்டு, சென்னை புறநகரில் வசிக்கும் ’சியா’ என்ற பர்மா கார்த்திகேயன் (மம்மூட்டி) என்னும் ஏஜெண்டிடம் ஒப்படைக்கப்படுகின்றன. அவர் அவற்றை தலைமறைவாக வெளிநாட்டில் இருக்கும் அப்துல் ஹமீது (நசீருதின் ஷா) என்ற சர்வதேச மாஃபியாவுக்கு பாதுகாப்பாக அனுப்பி வைத்து கமிஷன் பெற்றுக்கொள்கிறார்.
பல நூறு கோடி ரூபாய் பணம் புழங்கும் இந்த செம்மரக் கடத்தல் பிசினஸுக்கு முற்றுப்புள்ளி வைக்க நினைக்கும் புதிய ஆந்திர மாநில அரசு, செம்மரக் கடத்தல் கும்பலை வேரோடும் வேரடி மண்ணோடும் ஒழிக்க ஐ.பி.எஸ் அதிகாரி நித்யா ரெட்டி (சாய் பல்லவி) தலைமையில் ’செம்மரக் கடத்தல் தடுப்பு சிறப்பு அதிரடிப் படை’யை அமைக்கிறது.
சென்னை புறநகரில் இருக்கும் செம்மரக் கடத்தல் ஏஜெண்ட் சியா கும்பல் பற்றியும், அவருக்கும் மேல் வெளிநாட்டிலிருந்து இயங்கும் சர்வதேச மாஃபியா மற்றும் அந்த மாஃபியாவின் நெட்வொர்க் பற்றியும் ரகசியமாகத் தகவல் சேகரிக்கும் பணிக்காக, தமிழக காவல்துறையின் ரகசிய புலனாய்வு அதிகாரியான திருவண்ணாமலையைச் சேர்ந்த பழனிவேலை (தனுஷ்) தேர்வு செய்கிறார், சிறப்பு அதிரடிப் படையின் தலைவர் நித்யா ரெட்டி.

சென்னைக்கு வரும் பழனிவேல், ’திரு என்ற திருக்குமரன்’ என்னும் பொய்ப் பெயரில் ஒரு சாதாரண போட்டோகிராபர் போல் சியாவின் குழுவுக்குள் ஊடுருவி, சொற்ப நாட்களிலேயே சியாவின் பேரன்பையும் பெரும் நம்பிக்கையையும் பெற்றுவிடுகிறார். இதனால் சியா பற்றியும், அவரது தொடர்புகள் பற்றியும் எளிதாக தகவல்கள் சேகரித்து, தனது மேலதிகாரியான நித்யா ரெட்டிக்கு அனுப்புகிறார். சியாவுக்குத் தெரியாமலேயே, அவர் மூலமாகவே, சர்வதேச மாஃபியாவான அப்துல் ஹமீதை நெருங்க நித்யா ரெட்டி திட்டமிடுகிறார்.
இதனிடையே, செம்மரங்களை வெட்டவும் கடத்தவும் திருவண்ணாமலையிலிருந்து அழைத்து வரப்பட்ட ஏழைப் பழங்குடியினரான அப்பாவி கூலித் தொழிலாளர்களை, ஆந்திர மாநில ’செம்மரக் கடத்தல் தடுப்பு சிறப்பு அதிரடிப் படை’ போலீசார், ‘என்கவுண்ட்டர்’ என்ற பெயரில் போலி என்கவுண்ட்டர் நடவடிக்கை மேற்கொண்டு, ஈவு இரக்கமின்றி சரமாரியாக சுட்டுக் கொல்கிறார்கள். இதில் 20 அப்பாவித் தமிழர்கள் கொல்லப்படுகிறார்கள். அப்படி கொல்லப்பட்டவர்களில், ரகசிய புலனாய்வு அதிகாரி பழனிவேலின் அப்பாவான லாரி டிரைவர் சண்முகமும் (இந்திரன்ஸ்) ஒருவர்.
அப்பாவுக்கு இழைக்கப்பட்ட அநீதி கண்டு கதறித் துடிக்கும் பழனிவேல், கூலித் தொழிலாளர்களான அப்பாவித் தமிழர்கள் அங்கு ‘கைது’ என்ற பெயரிலும், ‘என்கவுண்ட்டர்’ என்ற பெயரிலும் அனுபவித்துக் கொண்டிருக்கும் துயரங்கள் பற்றி தெரிந்துகொள்கிறார்.
சர்வதேச மாஃபியாவின் பலமான பின்னணி கொண்ட செம்மரக் கடத்தல் கும்பலை முழுவதுமாக அழிக்கவும், பாதிக்கப்பட்ட அப்பாவித் தமிழர்களுக்கு நீதியையும், நிவாரணத்தையும் பெற்றுத் தரவும் பழனிவேல் தீவிர முயற்சிகளை மேற்கொள்கிறார். அவர் எத்தகைய முயற்சிகளை மேற்கொள்கிறார்? அந்த முயற்சிகளில் அவர் வெற்றி பெற்றாரா, இல்லையா? என்பது ‘O.M’ திரைப்படத்தின் மீதிக்கதை.
நாயகனாக, ரகசிய புலனாய்வு அதிகாரி பழனிவேலாகவும், செம்மரக் கடத்தல் கும்பலுக்குள் ஊடுருவி உளவு பார்க்கும் சாதாரண போட்டோகிராபர் திரு என்ற திருக்குமரனாகவும் இருவேறு பரிமாணங்களில் தனுஷ் நடித்திருக்கிறார். இந்த கதாபாத்திரத்துக்குத் தேவையான உடல் வாகு மற்றும் உடல்மொழியுடன், நடனம், அதிரடி ஆக்ஷன், எமோஷன் என எல்லா அம்சங்களிலும் எப்போதும் போல சிறப்பாக நடிப்பை வெளிப்படுத்தியிருக்கிறார். குறிப்பாக, சுட்டுக் கொல்லப்பட்டுக் கிடக்கும் அப்பாவின் சடலத்தைக் கையில் ஏந்தி கதறி அழுகையில், தான் ‘ நடிப்பு அசுரன்’ என்பதை மீண்டும் நிரூபித்திருக்கிறார்.
செம்மரக் கடத்தல் ஏஜெண்ட் சியா என்ற பர்மா கார்த்திகேயனாக மலையாள சூப்பர் ஸ்டார் மம்முட்டி நடித்திருக்கிறார். எந்த கதாபாத்திரத்திலும் தன்னை இயல்பாகப் பொருத்திக்கொள்ளும் திறன் படைத்த மம்முட்டி, ’காட்ஃபாதர்’ போன்ற இந்த கதாபாத்திரத்திலும் கச்சிதமாகப் பொருந்தியிருக்கிறார். ‘யானைப்பசிக்கு சோளப்பொரி’ என்பது போல, நடிப்பில் அசகாய சூரரான மம்முட்டியை இயக்குநர் ஏனோ தானோ என்று பயன்படுத்தியிருப்பதற்கு பதிலாக இன்னும் நன்றாகவும் செம்மையாகவும் பயன்படுத்தியிருக்கலாம்.
ஆந்திர மாநில ’செம்மரக் கடத்தல் தடுப்பு சிறப்பு அதிரடிப் படை’ தலைவர் நித்யா ரெட்டியாக சாய் பல்லவி அருமையாக நடித்திருக்கிறார். குறிப்பாக, அவருக்குப் புதியவையான அதிரடி ஆக்ஷன் காட்சிகளில் மிகவும் சிரத்தை எடுத்து நடித்து அப்ளாஸ் வாங்குகிறார்.
நாயகனின் மனைவி ரோஜாவாக ஸ்ரீலீலா நடித்திருக்கிறார். படத்தில் குறைவான நேரமே வந்தாலும், கொடுக்கப்பட்ட வேலையைக் குறைவின்றி நிறைவாக செய்திருக்கிறார்.
வெளிநாட்டில் வாழும் அப்துல் ஹமீது என்ற சர்வதேச மாஃபியா கதாபாத்திரத்துக்கு மாபெரும் கலைஞனான நசீருதீன் ஷாவைப் போட்டு, அவரை வீணடித்திருக்கிறார்கள்.
நாயகனின் அப்பா சண்முகமாக வரும் இந்திரன்ஸ், பார்வையாளர்களின் அனுதாபங்களை அள்ளிக் கொள்கிறார்.
ரேணு தேசாய், சைது ஜொன்னலகட்டா, சஞ்சய் ஸ்வரூப், தீனா, டி.எஸ்.கே உள்ளிட்ட ஏனைய நடிப்புக் கலைஞர்கள் தத்தமது கதாபாத்திரத்துக்குத் தேவையான நடிப்பை வழங்கியிருக்கிறார்கள்.
இப்படத்தை எழுதி இயக்கியிருக்கிறார் இயக்குநர் ராஜ்குமார் பெரியசாமி. 2015ஆம் ஆண்டு ஏப்ரல் 7ஆம் தேதி ஆந்திர மாநிலத்தின் சித்தூர் மாவட்டத்தில் உள்ள சேஷாசலம் வனப்பகுதியில், ‘செம்மரக் கடத்தல்காரர்கள்’ எனக் கூறி, தமிழ்நாட்டைச் சேர்ந்த 20 அப்பாவி கூலித் தொழிலாளர்களை, ஆந்திர அதிரடிப் படையினர் ‘போலி என்கவுண்ட்டரில்’ சுட்டுக் கொன்றார்கள். நெஞ்சை பதைபதைக்கச் செய்யும் இக்கொடூர உண்மைச் சம்பவத்தை மையமாகக் கொண்டு இப்படத்தை எடுத்ததற்காக இயக்குநரைப் பாராட்டலாம். அதுபோல் பொருத்தமான நடிப்புக் கலைஞர்களையும், தரமான தொழில்நுட்பக் கலைஞர்களையும் தேர்வு செய்து பயன்படுத்தியிருப்பதும் பாராட்டுக்கு உரியது. ஆனால், அரதப்பழசான திரைக்கதையும், படத்தின் மூன்று மணி நேர நீளமும் பார்வையாளர்களின் பொறுமையை சோதித்து, சோர்வடையச் செய்கிறது. நிறைய மெனக்கெட்டு திரைக்கதையில் சுவாரஸ்யமான புதுமைகளைப் புகுத்தி, படத்தின் நீளத்தை அரை மணி நேரம் குறைத்து விறுவிறுப்பைக் கூட்டியிருந்தால், தனுஷ் ரசிகர்கள் மட்டுமல்லாது அனைத்துத் தரப்பினரும் கொண்டாடும் படமாக இது அமைந்திருக்கும்.
சாய் அபயங்கரின் பாடலிசை மற்றும் பின்னணி இசை, கே.எழில் அரசுவின் ஒளிப்பதிவு, ஆர்.கலைவாணனின் படத்தொகுப்பு, சாண்டியின் நடன அமைப்பு, கேச்சா கம்பக் டீ, யானிக் பென் ஆகியோரின் ஸ்டண்ட் ஒருங்கிணைப்பு உள்ளிட்ட நேர்த்தியான தொழில் நுட்பங்கள் நன்று.
‘O.M’ – தனுஷின் அபார நடிப்புக்காகவும், சாய் அபயங்கரின் அருமையான இசைக்காகவும் பார்த்து ரசிக்கலாம்!
ரேட்டிங்: 3/5
