கார்மேனி செல்வம் – விமர்சனம்

நடிப்பு: சமுத்திரக்கனி, லட்சுமிபிரியா சந்திரமௌலி, கௌதம் வாசுதேவ் மேனன், அபிநயா, மாஸ்டர் சரண், கார்த்திக் குமார், கோதண்டம், மதுமிதா, படவா கோபி மற்றும் பலர்

எழுத்து & இயக்கம்: ராம் சக்ரி

ஒளிப்பதிவு: யுவராஜ் தக்ஷன்

படத்தொகுப்பு: தினேஷ் ஸ்ரீனிவாசன்

இசை: ராமானுஜம்

தயாரிப்பு: ‘பாத்வே புரொடக்ஷன்ஸ்’ அருண் ரங்கராஜுலு

பத்திரிகை தொடர்பு: நிகில் முருகன்

‘பேராசை பெருநஷ்டம்’ என்பது காலங்காலமாக சொல்லப்பட்டுவரும் ஆன்றோர் மொழி. இருந்தும் என்ன, பேராசையை கைவிட முடிகிறதா, என்ன? அது இழுக்கும் வழியில் சென்றால் என்ன நேரிடும்? அது தான் ‘கார்மேனி செல்வம்’.

இன்றைய நகர்ப்புற நடுத்தர குடும்ப வாழ்க்கையின் உண்மையான முகத்தைக் காட்டும் உன்னதப் படைப்பாக ‘கார்மேனி செல்வம்’ திரைக்கு வந்திருக்கிறது. தடாலடி சம்பவங்களோ, இதயத் துடிப்பை நிறுத்தும் திருப்பங்களோ இல்லாமல், ஒரு சாதாரண குடும்பத்தின் கனவுகள், ஆசைகள், தவறுகள், அதன் விளைவுகள் ஆகியவற்றை நுணுக்கமாக பதிவு செய்யும் யதார்த்தப் படைப்பாக இப்படம் அமைந்துள்ளது.

கதை, ஒரு சாதாரண எளிய மனிதனின் ஆசைகள் எப்படி அவனை சிக்கல்களுக்குள் தள்ளி, நிம்மதியைக் குலைக்கிறது என்ற சித்திரத்தை திரையில் சித்தரித்துக் காட்டுகிறது.

கார் டிரைவராக வேலை செய்யும் செல்வம் (சமுத்திரக்கனி), தன் மனைவி சாந்தி (லட்சுமிபிரியா சந்திரமௌலி) மற்றும் மகனுடன் அமைதியான வாழ்க்கை நடத்திக் கொண்டிருக்கும் நிலையில், “சொந்த வீடு” என்ற பெருங்கனவு அவரை கடன் வலைக்குள் சிக்க வைக்கிறது. தேவைக்காக தொடங்கிய கடன், பின்னர் வாழ்க்கையை கட்டுப்படுத்தும் சுமையாக மாறுகிறது. அது குடும்ப உறவுகளையும், மனித உறவுகளையும் எப்படி பாதிக்கிறது என்பதே படத்தின் அடிப்படைக் கதை.

கதையின் நாயகன் கார் டிரைவர் செல்வமாக சமுத்திரக்கனி நடித்திருக்கிறார். அவர் வழக்கம்போல இயல்பான நடிப்பில் கதாபாத்திரத்தை உயிர்ப்பிக்கிறார். அவர் வெளிப்படுத்தும் உளவியல் மாற்றங்கள் — நம்பிக்கை, தளர்ச்சி, தவிப்பு, குற்ற உணர்வு — அனைத்தும் நம்பகமாக பதிகின்றன.

அவருக்கு இணையாக, அவரது மனைவி சாந்தியாக லட்சுமி பிரியா சந்திரமௌலி நடித்திருக்கிறார். அவர் ஒரு நடுத்தர வர்க்கத்துக் குடும்பத் தலைவியின் மனநிலையை மிகவும் உணர்ச்சிகரமாக வெளிப்படுத்துகிறார். குடும்பத்தை காப்பாற்ற வேண்டும் என்ற உறுதி மற்றும் உள்ளுக்குள் புதைந்து கிடக்கும் ஆசைகள் ஆகிய இரண்டையும் சமநிலைப்படுத்தும் அவரது நடிப்பு படத்திற்கு வலு சேர்க்கிறது.

இதர முக்கிய கதாபாத்திரங்களாக வரும் கௌதம் வாசுதேவ் மேனன், அபிநயா மற்றும் இதர நடிகர்கள் கதையின் ஓட்டத்தை சீராக முன்னேற்ற உதவுகிறார்கள்.

இப்படத்தை எழுதி இயக்கியிருக்கிறார் இயக்குனர் ராம் சக்ரி. அத்தியாவசிய அவசரத் தேவைக்கு கடன் வாங்கலாமே தவிர, சக்திக்கு மிஞ்சிய ஆசைக்கோ, ஆடம்பரத்துக்கோ கடன் வாங்கக் கூடாது என்ற நல்ல கருத்தை மையமாகக் கொண்டு, கதாபாத்திரங்களையும், காட்சிகளையும் படைத்து, போரடிக்காமல், சுவாரஸ்யமாக, விறுவிறுப்பாக படத்தை நகர்த்திச் சென்றுள்ளார் இயக்குநர்.

ராமானுஜத்தின் தரமான இசை, யுவராஜ் தக்‌ஷனின் நேர்த்தியான ஒளிப்பதிவு, தினேஷ் ஸ்ரீனிவாசனின் ஸ்மூத்தான படத்தொகுப்பு உள்ளிட்ட தொழில்நுட்பங்கள் இயக்குநரின் கதை சொல்லலுக்கு உறுதுணையாக இருந்துள்ளன.

‘கார்மேனி செல்வம்’ – குடும்பத்துடன் பார்த்து மகிழலாம்! பாடமும் கற்கலாம்!

ரேட்டிங்: 3.5/5